തൃശ്ശൂർ: നാട്ടികയിലെ എംഎൽഎയായ സി.സി മുകുന്ദൻ സിപിഐ നിന്ന് രാജിവെച്ചു. നാട്ടികയിൽ സ്വതന്ത്ര സ്ഥാനാർത്ഥിയായി മത്സരിക്കുമെന്നും മറ്റു പാർട്ടികളുടെ പിന്തുണ സ്വീകരിക്കുമെന്നും അദ്ദേഹം അറിയിച്ചു. സിപിഐയിലെ നിരവധി പേർ പിന്തുണ അറിയിച്ചിട്ടുണ്ടെന്നും അദ്ദേഹം കൂട്ടിച്ചേർത്തു.
നാട്ടികയിലെ ലെഫ്റ്റ് ഡെമോക്രാറ്റിക് ഫ്രണ്ട് സ്ഥാനാർത്ഥിയായ ഗീതാ ഗോപിക്കെതിരെ സി.സി മുകുന്ദൻ വീണ്ടും ആരോപണം ഉന്നയിച്ചു. മകൾക്ക് 225 പവൻ വിവാഹ സമ്മാനമായി നൽകിയത് നാട്ടികയിൽ നിന്ന് പണം പിരിച്ചാണെന്നും പണം തിരികെ നൽകിയില്ലെന്നും അദ്ദേഹം ആരോപിച്ചു. പണം നൽകിയവർ പരാതിയുമായി സമീപിച്ചിട്ടുണ്ടെന്നും പറഞ്ഞു.
ഇക്കാര്യത്തിൽ ബിനോയ് വിശ്വം നൽകിയ ഉറപ്പിൽ വിശ്വാസമില്ലെന്നും മുകുന്ദൻ പ്രതികരിച്ചു. നാട്ടികയിലെ സ്ഥാനാർത്ഥിത്വം ‘പേയ്മെന്റ് സീറ്റ്’ ആണെന്ന ആരോപണം ഉയർത്തിയതിന് പിന്നാലെ സിപിഐയിൽ വിമർശനം ശക്തമായിരുന്നു.
സാമ്പത്തിക സ്വാധീനമാണ് ഗീതാ ഗോപിക്ക് സീറ്റ് ലഭിക്കാൻ കാരണമെന്നും പാർട്ടിക്ക് പണം പിരിച്ചു നൽകാൻ കഴിയാത്തതിനാലാണ് തന്നെ തഴഞ്ഞതെന്നും സി.സി മുകുന്ദൻ ആരോപിച്ചു. പാർട്ടി സീറ്റ് നൽകാത്ത പക്ഷവും നാട്ടികയിൽ മത്സരിക്കുമെന്ന നിലപാട് അദ്ദേഹം നേരത്തെ വ്യക്തമാക്കിയിരുന്നു.