കോഴിക്കോട്: കുതിരവട്ടം മാനസികാരോഗ്യ കേന്ദ്രത്തിൽ നിന്ന് അതിസാഹസികമായി ചാടിപ്പോയ ദൃശ്യ കൊലക്കേസ് പ്രതി വിനീഷിനെ (26) കണ്ടെത്താൻ പോലീസിന് ഇതുവരെ കഴിഞ്ഞില്ല. ഡിസംബർ 29-ന് രാത്രിയാണ് ഇയാൾ രക്ഷപ്പെട്ടത്. നഗരത്തിലെ പ്രധാന ബസ് സ്റ്റാൻഡുകൾ, റെയിൽവേ സ്റ്റേഷനുകൾ, വീടുകൾ എന്നിവിടങ്ങളിലെ സിസിടിവി ദൃശ്യങ്ങൾ മെഡിക്കൽ കോളേജ് പോലീസ് അരിച്ചുപെറുക്കിയെങ്കിലും വിനീഷിന്റെ ഒരു ദൃശ്യം പോലും കണ്ടെത്താനായിട്ടില്ല.
ഒരു സിസിടിവി ക്യാമറയിൽ പോലും പതിയാതെ വിനീഷ് എങ്ങനെ നഗരം വിട്ടു എന്നതാണ് അന്വേഷണസംഘത്തെ അത്ഭുതപ്പെടുത്തുന്നത്. ജയിലിലും സെല്ലിലും അക്രമസ്വഭാവം കാണിക്കുന്ന ഇയാളെക്കുറിച്ച് ലുക്കൗട്ട് നോട്ടീസ് പുറപ്പെടുവിച്ചിട്ടും ഇതുവരെ പൊതുജനങ്ങളിൽ നിന്ന് വിവരങ്ങളൊന്നും ലഭിച്ചിട്ടില്ല.
വിനീഷ് പുറത്തുനിൽക്കുന്നത് കൊല്ലപ്പെട്ട ദൃശ്യയുടെ കുടുംബത്തിന് വലിയ ഭീഷണിയാണെന്ന് പോലീസ് റിപ്പോർട്ടുണ്ട്.
ദൃശ്യയുടെ അമ്മയും സഹോദരിയും താമസിക്കുന്ന സ്ഥലത്ത് നിലവിൽ പോലീസ് കാവലുണ്ട്.
മഞ്ചേരി, പെരിന്തൽമണ്ണ പോലീസ് സ്റ്റേഷനുകളുടെ സഹായത്തോടെ പ്രതിയുടെ വീട്, ബന്ധുവീടുകൾ, ദൃശ്യയുടെ വീട് പരിസരം എന്നിവിടങ്ങളിൽ മഫ്തിയിൽ പോലീസ് നിരീക്ഷണം ഏർപ്പെടുത്തിയിട്ടുണ്ട്.
2022-ലും ഇയാൾ കുതിരവട്ടത്ത് നിന്ന് രക്ഷപ്പെട്ടിരുന്നു. അന്ന് കർണാടകയിലെ ധർമ്മസ്ഥലയിൽ നിന്നാണ് നാട്ടുകാർ ഇയാളെ പിടികൂടിയത്. ഇത്തവണയും പോലീസ് സംഘം ധർമ്മസ്ഥലയിലെത്തി അന്വേഷണം നടത്തിയെങ്കിലും പ്രതിയെക്കുറിച്ച് വിവരമൊന്നും ലഭിച്ചില്ല.
2021-ൽ പ്രണയാഭ്യർത്ഥന നിരസിച്ചതിനാണ് പെരിന്തൽമണ്ണ സ്വദേശിനിയും നിയമവിദ്യാർത്ഥിനിയുമായ ദൃശ്യയെ വിനീഷ് വീട്ടിൽ കയറി കുത്തിക്കൊലപ്പെടുത്തിയത്. ദൃശ്യയുടെ പിതാവിന്റെ കടയ്ക്ക് തീയിട്ട ശേഷമായിരുന്നു ഈ ക്രൂരകൃത്യം. കണ്ണൂർ സെൻട്രൽ ജയിലിൽ റിമാൻഡിൽ കഴിയുന്നതിനിടെ മാനസികാസ്വാസ്ഥ്യം പ്രകടിപ്പിച്ചതിനെ തുടർന്നാണ് ഇയാളെ കുതിരവട്ടത്തേക്ക് മാറ്റിയത്.അതീവ അപകടകാരിയായ ഈ പ്രതിയെ എത്രയും വേഗം പിടികൂടാൻ ഊർജിതമായ ശ്രമം തുടരുകയാണെന്ന് പോലീസ് അറിയിച്ചു.