കഴിഞ്ഞ് ഹസീനയും മകനും
കോഴിക്കോട്: ഭർത്താവ് മുത്തലാഖ് ചൊല്ലി പുറത്താക്കിയ യുവതിയും ഒൻപത് വയസ്സുകാരനായ മകനും അഭയമില്ലാതെ ഭർതൃവീടിന്റെ വരാന്തയിൽ കഴിയാൻ തുടങ്ങിയിട്ട് ഒമ്പത് ദിവസമാകുന്നു. ഫറോക്ക് സ്വദേശിനി ഹസീനയ്ക്കാണ് ഈ ദുരവസ്ഥ. കോടതി വിധി അനുകൂലമായിട്ടും വീട് പൂട്ടി ഭർത്താവ് മുഹമ്മദ് ഫാസിൽ മുങ്ങിയതോടെയാണ് ഹസീനയും മകനും പെരുവഴിയിലായത്.
പത്തുവർഷം മുമ്പായിരുന്നു ഇവരുടെ വിവാഹം. കുട്ടിയുണ്ടായതോടെ പിതൃത്വത്തിൽ സംശയം ആരോപിച്ചും വിദ്യാഭ്യാസ യോഗ്യത പോരെന്ന കാരണത്താലും ഫാസിൽ പീഡനം തുടങ്ങിയെന്ന് ഹസീന പറയുന്നു. 2018-ൽ സ്വന്തം വീട്ടിലേക്ക് പോയ ഹസീനയെ പിന്നീട് ഇയാൾ തിരികെ വിളിച്ചില്ല. ഇതിനിടെ ഹസീനയുമായുള്ള ഒത്തുതീർപ്പ് ചർച്ചകൾ നടക്കുമ്പോൾ തന്നെ ഫാസിൽ രണ്ടാമതൊരു വിവാഹം കഴിക്കുകയും ചെയ്തു.
വീട് പൂട്ടി മുങ്ങി: ഭർത്താവിനൊപ്പം താമസിക്കാൻ കോടതി ഉത്തരവുമായി ഹസീന എത്തിയപ്പോഴേക്കും ഫാസിലും കുടുംബവും വീട് പൂട്ടി മറ്റൊരു സ്ഥലത്തേക്ക് താമസം മാറ്റി.
അടിസ്ഥാന സൗകര്യങ്ങളില്ല: വീടിന്റെ വൈദ്യുതിയും കുടിവെള്ള ബന്ധവും വിച്ഛേദിച്ച നിലയിലാണ്. പ്രാഥമിക കൃത്യങ്ങൾ പോലും നിർവഹിക്കാൻ കഴിയാതെ കൊടും തണുപ്പിലും ദുരിതത്തിലുമാണ് ഈ അമ്മയും മകനും.
പോലീസ് നിസ്സഹായർ: കോടതി ഉത്തരവുണ്ടെങ്കിലും വീട് പൂട്ടിക്കിടക്കുന്നതിനാൽ പോലീസിനും കൃത്യമായി ഇടപെടാൻ സാധിക്കുന്നില്ല. വി.പി. സുഹ്റ ഉൾപ്പെടെയുള്ള സാമൂഹ്യപ്രവർത്തകർ സ്ഥലത്തെത്തിയെങ്കിലും വീട്ടിൽ പ്രവേശിക്കാൻ കഴിഞ്ഞിട്ടില്ല.
വിവാഹസമയത്ത് നൽകിയ 42 പവൻ സ്വർണവും ഒരു ലക്ഷം രൂപയും തിരികെ വേണമെന്നാണ് ഹസീനയുടെ ആവശ്യം. 25 ലക്ഷം രൂപ വരെ നൽകാമെന്ന് ഫാസിലിന്റെ കുടുംബം ചർച്ചകളിൽ സമ്മതിച്ചിരുന്നെങ്കിലും, സ്വർണം സംബന്ധിച്ച ഹസീനയുടെ ആരോപണങ്ങൾ അടിസ്ഥാനരഹിതമാണെന്നാണ് അവരുടെ വാദം.
നിയമപരമായ വിവാഹമോചനം നടന്നിട്ടില്ലെന്നും കോടതി ഉത്തരവ് നടപ്പിലാക്കി നീതി ലഭിക്കണമെന്നുമാണ് ഹസീനയുടെ ഉറച്ച നിലപാട്.