മേപ്പാടി: വയനാട് കള്ളാടിയിൽ മണ്ണിടിച്ചിൽ ദുരന്തമുണ്ടായ പ്രദേശത്ത് സർക്കാർ നിയോഗിച്ച വിദഗ്ധ സംഘം പരിശോധന നടത്തി. തുരങ്കപാത നിർമാണ പ്രവർത്തനങ്ങളുടെ ഭാഗമായി പദ്ധതി പ്രദേശത്ത് വലിയ തോതിൽ കൂട്ടിയിട്ടിരിക്കുന്ന മണ്ണ് സുരക്ഷിതമായി നീക്കം ചെയ്യുന്നതിനുള്ള സാധ്യതകളാണ് സംഘം വിലയിരുത്തിയത്.
അപകടത്തിന്റെ പശ്ചാത്തലത്തിൽ, നിർമാണ മേഖലയിൽ മലപോലെ കൂട്ടിയിട്ടിരിക്കുന്ന മണ്ണ് എങ്ങനെ സുരക്ഷിതമായി മറ്റൊരിടത്തേക്ക് മാറ്റാമെന്നത് സംബന്ധിച്ച് പഠിച്ച് റിപ്പോർട്ട് സമർപ്പിക്കാനാണ് സർക്കാർ മൂന്നംഗ സമിതിയെ നിയോഗിച്ചത്. സമിതിയുടെ റിപ്പോർട്ടിന്റെ അടിസ്ഥാനത്തിലായിരിക്കും തുടർനടപടികൾ സംബന്ധിച്ച അന്തിമ തീരുമാനം.
വയനാട് തുരങ്കപാത പദ്ധതിയുടെ ഭാഗമായി നീക്കം ചെയ്ത മണ്ണാണ് നിർമാണ പ്രദേശത്ത് വലിയ കൂമ്പാരങ്ങളായി സംഭരിച്ചിരുന്നത്. അപകടസാധ്യത ചൂണ്ടിക്കാട്ടി ഈ മണ്ണ് എത്രയും വേഗം നീക്കം ചെയ്യണമെന്ന് ജില്ലാ ഭരണകൂടം മണ്ണിടിച്ചിൽ ദുരന്തത്തിന് മുമ്പ് തന്നെ നിർദേശം നൽകിയിരുന്നുവെന്നാണ് വിവരം.
കോഴിക്കോട് എൻഐടിയിലെ പ്രൊഫസർ ഡോ. സന്തോഷ് ജി. തമ്പി, എൻസിഇഎസ്എസ് പ്രതിനിധി കെ. ശ്രീലേഷ് എന്നിവരാണ് പരിശോധനയ്ക്കായി സ്ഥലത്തെത്തിയത്. സമിതിയിലെ അംഗമായ പരിസ്ഥിതി ഡയറക്ടറേറ്റിലെ എൻജിനീയർ ഡോ. ജൂഡ് പരിശോധനയിൽ പങ്കെടുത്തില്ല.
അതേസമയം, തുരങ്കപാത പദ്ധതിയുമായി ബന്ധപ്പെട്ട സാങ്കേതിക കാര്യങ്ങൾ വിലയിരുത്തുന്നതിനായി കൊങ്കൺ റെയിൽവേ നിയോഗിച്ച വിദഗ്ധ സംഘവും ദുരന്തസ്ഥലം സന്ദർശിച്ച് പരിശോധന നടത്തി. വിദഗ്ധ സമിതികളുടെ റിപ്പോർട്ടുകൾ ലഭിച്ചതിന് ശേഷമേ നിർമാണ പ്രവർത്തനങ്ങളുടെ ഭാവിയും മണ്ണ് നീക്കുന്നതിനുള്ള നടപടികളും സംബന്ധിച്ച് സർക്കാർ അന്തിമ തീരുമാനം കൈക്കൊള്ളുകയുള്ളുവെന്നാണ് അധികൃതർ വ്യക്തമാക്കുന്നത്.