കണ്ണൂർ: മുഖ്യമന്ത്രി പിണറായി വിജയന്റെ റോഡ് ഷോ നാളെ കണ്ണൂരിൽ നടക്കും. മട്ടന്നൂർ വിമാനത്താവളത്തിൽ നിന്ന് പിണറായി വരെ റോഡ് ഷോ സംഘടിപ്പിച്ചിരിക്കുകയാണ്. ടി. കെ. ഗോവിന്ദന്റെ മരുമകൾ ടി. കെ. സുലേഖ പ്രകടനത്തിന്റെ മുൻനിരയിൽ ഉണ്ടാകും. ഇരിക്കൂർ ബ്ലോക്ക് പഞ്ചായത്ത് പ്രസിഡന്റാണ് സുലേഖ.
തെരഞ്ഞെടുപ്പ് തീയതി പ്രഖ്യാപിച്ചതിന് പിന്നാലെയാണ് നിയമസഭ തെരഞ്ഞെടുപ്പിലേക്കുള്ള സ്ഥാനാർഥികളെ സി.പി.ഐ.(എം) പ്രഖ്യാപിച്ചത്. പാർട്ടി സംസ്ഥാന സെക്രട്ടറി എം. വി. ഗോവിന്ദൻ മാസ്റ്റർ നടത്തിയ വാർത്താസമ്മേളനത്തിലാണ് പ്രഖ്യാപനം നടന്നത്. ഇക്കുറിയും ധർമ്മടം മണ്ഡലത്തിലാണ് മുഖ്യമന്ത്രി പിണറായി വിജയൻ മത്സരിക്കുന്നത്.
കണ്ണൂർ ജില്ലയിലെ നിയമസഭ മണ്ഡലങ്ങളിലൊന്നാണ് ധർമ്മടം. ചെമ്പിലോട്, കടമ്പൂർ, പെരളശ്ശേരി, ധർമ്മടം, പിണറായി, മുഴപ്പിലങ്ങാട്, വേങ്ങാട്, അഞ്ചരക്കണ്ടി എന്നീ പഞ്ചായത്തുകൾ ചേർന്നാണ് ധർമ്മടം മണ്ഡലം രൂപീകരിച്ചിരിക്കുന്നത്. 2008ലാണ് ഈ മണ്ഡലം നിലവിൽ വന്നത്.
2021ലെ വോട്ടർ പട്ടിക പ്രകാരം മണ്ഡലത്തിൽ 1,93,486 വോട്ടർമാരുണ്ട്. കഴിഞ്ഞ നിയമസഭ തെരഞ്ഞെടുപ്പിൽ 95,522 വോട്ടുകൾ നേടിയാണ് പിണറായി വിജയൻ വിജയം സ്വന്തമാക്കിയത്.