സൂര്യയെയും കാർത്തിയെയും സന്ദർശിച്ച് ടൊവീനോ തോമസ്

നടൻ ടൊവീനോ തോമസ് തമിഴ് താരങ്ങളായ സൂര്യയെയും കാർത്തിയെയും സന്ദർശിച്ചു. ഇരുതാരങ്ങൾക്കും നടുവിലായി താരം നിൽക്കുന്ന ഫോട്ടോയോടൊപ്പം ടോവിനോയുടെ കുറിപ്പും സോഷ്യൽ മീഡിയയിൽ ശ്രദ്ധ നേടി. നടൻ ആകാൻ ആഗ്രഹിച്ചു നടന്ന നാളുകളിൽ സൂര്യയും കാർത്തിയും വലിയ പ്രചോദനമായിരുന്നുവെന്ന് ടൊവീനോ കുറിച്ചു.

ടൊവീനോയുടെ വാക്കുകൾ: “ഒരു നടനാകാൻ ആഗ്രഹിച്ചു നടന്ന വർഷങ്ങളിൽ, ഈ രണ്ടുപേരും എനിക്ക് അവരുടേതായ വഴികളിൽ പ്രചോദനം നൽകിയിട്ടുണ്ട്. അതിഗംഭീര അഭിനേതാക്കളും വ്യക്തികളുമായ ഈ രണ്ടു പേരുടെ നടുവിൽ ഇന്ന് നിൽക്കുമ്പോൾ, എന്റെ യാത്രയിൽ അവർ ചെലുത്തിയ സ്വാധീനത്തെക്കുറിച്ച് കൃതജ്ഞതാപൂർവം ഓർക്കാൻ ആഗ്രഹിക്കുന്നു. സൂര്യയെയും കാർത്തിയെയും നേരിട്ടു കണ്ട് കുറച്ചു സമയം ചിലവഴിക്കാൻ സാധിച്ചതിൽ ഒരുപാടു സന്തോഷം. ഒപ്പം നാളെ റിലീസ് ചെയ്യാനിരിക്കുന്ന കാർത്തിയുടെ മെയ്യഴകന് ഹൃദയം നിറഞ്ഞ ആശംസകൾ!”

സൂര്യയും കാർത്തിയും ടൊവീനോയും ഒരുമിച്ചു നിൽക്കുന്ന ചിത്രം ആരാധകർ ഏറ്റെടുത്തു. രസകരമായ നിരവധി കമ്മന്റുകളാണ് പോസ്റ്റിനു താഴെ. മൂന്നു പേരുടെയും ലുക്കുകളിലെ സാമ്യതയെക്കുറിച്ചായിരുന്നു നടി സുരഭി ലക്ഷ്മിയുടെ രസകരമായ പ്രതികരണംശ്രദ്ധ നേടി ‘ഒരമ്മ പെറ്റ അളിയന്മാരാണെന്നേ പറയൂ,’ സുരഭി കുറിച്ചു.