തുമ്പച്ചെടിയെ പേടിക്കണോ ? വിദഗ്ധർ പറയുന്നത്..

കൊച്ചി: ഓണം അടുക്കുമ്പോൾ തുമ്പപ്പൂവും മറ്റുപ്പൂക്കളുമൊക്കെ ചർച്ച വിഷയം ആകാറുണ്ട്. പണ്ട് നമ്മുടെ തൊടിയിൽ ഇഷ്ടംപോലെ കണ്ടിരുന്നാണ് തുമ്പച്ചെടി ഇപ്പോൾ അങ്ങനെ കാണാനേ ഇല്ല. എന്നാൽ ഓണം അടുത്തത് കൊണ്ടല്ല തുമ്പച്ചെടി വാർത്തകളിൽ ഇടം പിടിച്ചത്. ചേർത്തലയിൽ തുമ്പച്ചെടി കൊണ്ടുള്ള തോരൻ കഴിച്ചതിനു ശേഷം അനുഭവപ്പെട്ട ശാരീരിക അസ്വസ്ഥതകൾക്കു പിന്നാലെ യുവതി മരിച്ചിരുന്നു. ഇതോടെ ഈ ചെടി അപകടകാരിയാണോ എന്ന ചോദ്യം ഉയര്‍ന്നിരിക്കുന്നത്. ആയുർവ്വേദ മരുന്നുകളിലും മറ്റും ഉപയോഗിക്കുന്ന സസ്യമെന്ന നിലയിലാണ് തുമ്പയെ നാം അറിയുന്നത്. ഈ സസ്യം നേരിട്ട് ഭക്ഷണമാക്കുന്നവർ കുറവാണ്. എങ്കിലും ചിലർ തുമ്പയില തോരൻ വെച്ചും മറ്റും കഴിക്കാറുണ്ട്. ഇതിന്റെ പാചകരീതികൾ യൂടൂബ് പോലുള്ള മാധ്യമങ്ങളിൽ ധാരാളം ലഭ്യമാണ്. ആരോഗ്യ ഗുണങ്ങൾ ഏറെയുണ്ടെന്ന് പറയുന്ന ഇത്തരം പാചകക്കുറികളിലും വീഡിയോകളിലും തുമ്പ അപകടകാരിയാണോ എന്ന് പറയുന്നില്ല.

വ്യാഴാഴ്ച രാത്രി തുമ്പച്ചെടി കൊണ്ടുള്ള തോരൻ കഴിച്ചാണ് ഇന്ദു ഉറങ്ങിയത്. പുലർച്ചെ ഇന്ദുവിന് ശാരീരിക അസ്വാസ്ഥ്യം ഉണ്ടാകുയായിരുന്നു. ഉടനെ ചേർത്തലയിലെ ഒരു ആശുപത്രിയിൽ പ്രവേശിപ്പിച്ചു. പിന്നീട് നെട്ടൂരിലെ ആശുപത്രിയിലും പ്രവേശിപ്പിച്ചു. വൈകീട്ടോടെ മരിച്ചു. എന്താണ് മരണകാരണമെന്ന് ശാസ്ത്രീയമായി തെളിയിക്കപ്പെട്ടിട്ടില്ല ഇതുവരെ. സാമ്പിളുകൾ പരിശോധനയ്ക്ക് അയയ്ക്കുന്നുണ്ട്. ഇതിന്റെ റിസൾട്ട് വന്നാൽ മാത്രമേ മരണകാരണം വ്യക്തമാകൂ. അസ്വാഭാവിക മരണത്തിനാണ് കേസെടുത്തിരിക്കുന്നത്.

തുമ്പ തോരൻ വച്ച് കഴിച്ചതിനെ തുടർന്നുണ്ടായ ഭക്ഷ്യവിഷബാധയെന്നാണ് എഫ്ഐആർ. ഈ സസ്യം ചിലർക്ക് അപകടകരമായി മാറാൻ സാധ്യതയുണ്ടെന്നാണ് ഡോക്ടർമാർ പറയുന്നത്. പ്രത്യേകിച്ച് മറ്റ് രോഗങ്ങളുള്ളവർക്ക്. മരിച്ച ഇന്ദുവിന് പ്രമേഹവും ഗോയിറ്റർ രോഗവും ഉണ്ടായിരുന്നതായി ബന്ധുക്കൾ പറയുന്നു.

അതെസമയം ഇതേ ഭക്ഷണം കഴിച്ച വീട്ടിലെ മറ്റുള്ളവർക്ക് പ്രശ്നങ്ങളൊന്നും ഇല്ല. മുറിയിൽ നിന്ന് വിഷ വസ്തുക്കളൊന്നും ലഭിച്ചിട്ടുമില്ല. അരളിയിലയും പൂവുമെല്ലാം ശരീരത്തിന് അപകടകരമാണെന്ന് തെളിയിക്കപ്പെട്ടതാണ്. എന്നാൽ ഇത്രയും പ്രശ്നം തുമ്പയ്ക്ക് ഉള്ളതായി എവിടെയും പറയുന്നില്ല. ഭക്ഷ്യയോഗ്യമായ സസ്യങ്ങളുടെ കൂട്ടത്തിലാണ് തുമ്പയെ പല പഠനങ്ങളും പെടുത്തിയിരിക്കുന്നത്. ഇത് പക്ഷെ ആയുർവ്വേദ മരുന്നുകളിൽ ഉപയോഗിക്കുന്നതിന്റെ കൂടി പശ്ചാത്തലത്തിലാണ്. നിയന്ത്രിതമായ അളവിലാണ് മരുന്നുകളിൽ ഇവ ഉപയോഗിക്കുക. ഉയർന്ന അളവിൽ ശരീരത്തിലെത്തുമ്പോൾ ചെറിയ തോതിൽ ടോക്സിക് ആകാനുള്ള സാധ്യതയും ചില പഠനങ്ങൾ ചൂണ്ടിക്കാട്ടുന്നുണ്ട്. പാകം ചെയ്യാവുന്ന ‘പോട്ട് ഹെർബ്’ ആയിത്തന്നെയാണ് തുമ്പ മിക്കയിടത്തും കാണുന്നത്.

തുമ്പ വ്യാപകമായി ലഭ്യമായ സസ്യമാണെങ്കിലും അത്രയും വ്യാപകമായി ഭക്ഷണത്തിൽ അവ ഉപയോഗിക്കുന്നില്ല. രോഗാവസ്ഥകൾ ഉള്ളവർക്ക് അപകടകാരിയായി തുമ്പ മാറുമെന്നതാകാം ഒരു പക്ഷെ ഇതിനു കാരണം. കൂടുതൽ വ്യക്തത വരാൻ മരിച്ച ഇന്ദുവിന്റെ സാമ്പിൾ പരിശോധനാ ഫലം കൂടി വരാൻ കാത്തിരിക്കേണ്ടി വരും.