ആശുപത്രിയില്‍ അമ്മയ്ക്ക് കൂട്ടിരുന്ന മകന്റെ മൊബൈല്‍ ഫോണ്‍ കവര്‍ന്നു; മോഷ്ടാവിന്റെ സിസിടിവി ദൃശ്യങ്ങള്‍ പുറത്ത്
തൃശൂര്‍: തൃശൂര്‍ ജില്ല ആശുപത്രിയില്‍ മോഷ്ടാവിന്റെ വിളയാട്ടം. ഐസിയുവില്‍ കിടക്കുന്ന അമ്മയ്ക്ക് കാവലിരുന്ന മകന്റെ 16,500 രൂപ വിലയുള്ള മൊബൈല്‍ അടിച്ചുമാറ്റി. സാംസങ് A13 മോഡല്‍ മൊബൈലാണ നഷ്ടപ്പെട്ടത്. മോഷ്ടാവിന്റേ CCTV ദൃശ്യങ്ങള്‍ പൊലീസിനു ലഭിച്ചു. കുട്ടനെല്ലൂര്‍ സ്വദേശിയായ ചെമ്പില്‍ സന്തോഷിന്റെ മൊബലാണ് മോഷ്ടാവ് കവര്‍ന്നത്.
സോഡിയം കുറഞ്ഞതിനെ തുടര്‍ന്നാണ് അമ്മ ദേവകിയെ ഐസിയുവില്‍ പ്രവേശിപ്പിച്ചത്. തിങ്കളാഴ്ച പുലര്‍ച്ചെ നാലു മണിയോടെയായിരുന്നു മോഷണം. ഐസിയുവിനു മുമ്പില്‍ ഉറങ്ങിക്കിടക്കുകയായിരുന്നു സന്തോഷ് അഞ്ചു മണിക്ക് ഉണര്‍ന്നപ്പോഴാണ് മൊബൈല്‍ നഷ്ടപ്പെട്ടത് അറിയുന്നത്. ഒപ്പം സഹോദരിയും സഹോദരി പുത്രനും ഉണ്ടായിരുന്നെങ്കിലും അവരും ഉറക്കത്തിലായിരുന്നു.
ദൃശ്യങ്ങള്‍ പരിശോധിച്ച പൊലീസ് പ്രതിയെ തിരിച്ചറിഞ്ഞിട്ടുണ്ട്. ഇയാള്‍ നേരത്തെയും ഇവിടെ മോഷണം നടത്തിയതിന് പിടിയിലായിട്ടുണ്ടെന്ന് സമീപത്തെ ഓട്ടോ ഡ്രൈവര്‍മാരും പറയുന്നു. ഇന്റീരിയര്‍ വര്‍ക്കാണ് സന്തോഷിന് . നഗര ഹൃദയത്തില്‍ സ്ഥിതി ചെയ്യുന്ന ആശുപത്രിയിലെ മോഷ്ടാവിന്റെ വിളയാട്ടം ആശങ്കയുണ്ടാക്കിയിട്ടുണ്ട്. ഈസ്റ്റ് പൊലീസ് സ്റ്റേഷനും സമീപമാണ്.
