നിലമ്പൂ‍ർ ഉപതിരഞ്ഞെടുപ്പ്; യുഡിഎഫിന് പിന്തുണ നൽകാൻ വെൽഫയർ പാർട്ടി
നിലമ്പൂ‍ർ ഉപതിരഞ്ഞെടുപ്പിൽ യുഡിഎഫിന് പിന്തുണ നൽകാൻ വെൽഫയർ പാർട്ടി. ഉപാധികളോടെ യുഡിഎഫിനെ പിന്തുണയ്ക്കാൻ വെൽഫെയർ പാർട്ടിയുടെ നേതൃയോഗത്തിൽ തീരുമാനമായി. അൻവർ ഉയർത്തിയ വിഷയങ്ങൾ ചർച്ചയാകണമെന്നും വെൽഫെയർ പാർട്ടി നേതൃയോഗത്തിൽ ആവശ്യമുയർന്നു. ആര്യാടൻ ഷൗക്കത്തിന് പിന്തുണ നൽകുന്ന വിവരം പരസ്യമായി പ്രഖ്യാപിച്ചുകൊണ്ട് തെരഞ്ഞെടുപ്പിനു വേണ്ടി പ്രവർത്തിക്കാനാണ് നേതൃയോഗത്തിന്റെ തീരുമാനം. യുഡിഎഫിനുള്ള പിന്തുണ വെൽഫെയർ പാർട്ടി ഇന്ന് തന്നെ ഔദ്യോഗികമായി പ്രഖ്യാപിക്കും.
മുൻപ് യുഡിഎഫിൽ അസോഷ്യേറ്റ് കക്ഷിയായി ഉൾപ്പെടുത്തണമെന്ന ആവശ്യം വെൽഫെയർ പാർട്ടി യുഡിഎഫ് നേതൃത്വത്തിന് മുന്നിൽ വെച്ചുവെന്ന് വിവരങ്ങളുണ്ടായിരുന്നു. ജമാഅത്തെ ഇസ്ലാമിയുടെ പിന്തുണയുള്ള വെൽഫെയർ പാർട്ടിയുമായി സഹകരിക്കുന്നതിൽ മുസ്ലിം ലീഗിന് പഴയ എതിർപ്പില്ലാത്ത സാഹചര്യം ചൂണ്ടിക്കാണിച്ചായിരുന്നു ആവശ്യമെന്നുമായിരുന്നു പുറത്തുവന്നിരുന്നത്. നേരത്തെ യുഡിഎഫിൻ്റെ വെൽഫെയർ പാർട്ടി സഹകരണവുമായി ബന്ധപ്പെട്ട് ഇടതുപക്ഷം ശക്തമായ ആരോപണങ്ങൾ ഉന്നയിച്ചിരുന്നു. ജമാഅത്തെ ഇസ്ലാമി ആർ‌എസ്എസിനെപ്പോലെ മതരാഷ്ട്രവാദികളാണ് എന്ന ശക്തമായ വിമ‍ർശനം സിപിഐഎം ഉന്നയിച്ച പശ്ചാത്തലത്തിലാണ് യുഡിഎഫുമായി കൈകോർക്കാനുള്ള വെൽഫെയർ പാർട്ടിയുടെ നീക്കം.
