ഹെൽമെറ്റ് ധരിക്കാതെ മോഷ്ടിച്ച ഇരുചക്രവാഹനവുമായി യുവാവ്; പിന്തുടര്‍ന്ന് പിടിച്ച് എംവിഡി
പത്തനംതിട്ട: അടൂർ ഏഴംകുളത്തു വെച്ച് മോട്ടോർ വാഹന വകുപ്പ് വാഹന പരിശോധന നടത്തുന്നതിനിടെ മോഷ്ടിച്ച ഇരുചക്രവാഹനവുമായി പോയ യുവാവിനെ പിന്തുടര്‍ന്ന് പിടികൂടി. അനീഷ് ഖാൻ (38) ആണ് പിടിയിലായത്. പത്തനാപുരം സ്വദേശിയാണ് ഇയാൾ. പ്രതിയെ അടൂർ പൊലീസിന് കൈമാറി. പത്തനംതിട്ട എൻഫോഴ്‌സ്‌മെന്‍റ് അടൂർ സ്‌ക്വാഡ് എം വി ഐ ഷമീറിന്‍റെ നേതൃത്വത്തിൽ എ എം വി ഐമാരായ സജിംഷാ, വിനീത് എന്നിവർ ചേർന്നാണ് വാഹന പരിശോധന നടത്തിയത്.
ഇന്ന് രാവിലെ 10 മണിയോട് കൂടി പ്ലാന്‍റേഷൻ ജംഗ്ഷന് സമീപം ഇവര്‍ വാഹന പരിശോധന നടത്തവേ ഹെൽമെറ്റ് ധരിക്കാതെ ഓടിച്ചു വന്ന ഇരുചക്ര വാഹനം നിർത്താൻ സിഗ്നൽ നൽകിയിട്ടും നിർത്താതെ അപകടകരമായ രീതിയിൽ ഏഴംകുളം ഭാഗത്തേക്ക് ഓടിച്ചു പോവുകയായിരുന്നു.
ഇതോടെ എംവിഡി ഉദ്യോഗസ്ഥർ ആര്‍ സി ഉടമയെ ഫോണിൽ ബന്ധപ്പെട്ടപ്പോൾ ഈ വാഹനം പട്ടാഴി അമ്പലത്തിന് സമീപം വെച്ച് കഴിഞ്ഞ ദിവസം മോഷണം പോയതായും കുന്നിക്കോട് പൊലീസ് സ്റ്റേഷനിൽ പരാതി നല്‍കിയിരുന്നതായും അദ്ദേഹം അറിയിച്ചു. തുടർന്ന് ഈ വാഹനം കണ്ടെത്തുന്നതിനായുള്ള തെരച്ചിലിനൊടുവിൽ ഏഴംകുളം ഭാഗത്തു വെച്ച് അമിത വേഗതയിൽ കൈപ്പറ്റൂർ റോഡിലേക്ക് പോകുന്നത് ശ്രദ്ധയിൽപ്പെട്ടു. ഇതോടെ വാഹനത്തെ പിന്തുടർന്ന് പോയി ഏഴംകുളം എൽ പി സ്കൂളിന് സമീപത്ത് വച്ച് പിടികൂടുകയായിരുന്നു.
