‘പ്രിയപ്പെട്ടവരെ നഷ്‍ടപ്പെട്ടവര്‍ക്കൊപ്പം’; വയനാട്ടില്‍ രക്ഷാപ്രവര്‍ത്തനം നടത്തുന്നവര്‍ക്ക് സല്യൂട്ടെന്ന് ദുല്‍ഖര്‍
വയനാട്: ഇന്നോളം കേരളം നേരിട്ട വലിയ ദുരന്തങ്ങളില്‍ ഒന്നായിരിക്കുകയാണ് മുണ്ടക്കൈ. സര്‍വതും നഷ്‍ടപ്പെട്ട് ക്യാമ്പുകളില്‍ നിരവധിപ്പേരാണുള്ളത്. നിരവധി ആളുകളെ കണ്ടെത്താനാനുണ്ടെന്നും ആണ് ദുരന്ത ഭൂമിയിലെ റിപ്പോര്‍ട്ടുകളില്‍ നിന്ന് മനസ്സിലാകുന്നത്. സിനിമ മേഖലയിലെ നിരവധി പേർ പ്രതികരണവുമായി രംഗത്തെത്തി. ധീരതയുടെയും ഐക്യത്തിന്റെ അവിശ്വസനീയമായ കാഴ്‍ചകളാണ് വയനാട്ടില്‍ കാണാൻ സാധിക്കുന്നതെന്ന് ദുല്‍ഖര്‍ പ്രതികരിച്ചു. വയനാട്ടില്‍ രക്ഷാപ്രവര്‍ത്തനം നടത്തുന്നവര്‍ക്ക് സല്യൂട്ടെന്ന് പറഞ്ഞ ദുല്‍ഖര്‍ പ്രിയപ്പെട്ടവരെ നഷ്‍ടപ്പെട്ടവര്‍ക്കൊപ്പം തന്റെ മനസുണ്ടെന്നും എല്ലാവര്‍ക്കുമായി പ്രാര്‍ഥിക്കുന്നുവെന്നും പറയുന്നു.
സാമൂഹ്യ മാധ്യമത്തില്‍ ഒരു കുറിപ്പ് എഴുതിയാണ് താരം പിന്തുണ രേഖപ്പെടുത്തിയത്. ധീരതയുടെയും ഐക്യത്തിന്റെ അവിശ്വസനീയമായ കാഴ്‍ചകളാണ് വയനാട്ടില്‍ കാണാനാകുന്നത് എന്ന് ദുല്‍ഖര്‍ എഴുതി. പ്രിയപ്പെട്ടവരെ നഷ്‍ടപ്പെട്ടവര്‍ക്കൊപ്പം എന്റെ മനസ്സുമുണ്ട്. ദൈവം നിങ്ങളുടെ വേദന കുറയ്‍ക്കട്ടെ. ആര്‍മി ഉദ്യോഗസ്ഥര്‍ക്കും സല്യൂട്ട്. രക്ഷാപ്രവര്‍ത്തനങ്ങള്‍ നടത്തുന്ന ഹീറോകള്‍ക്ക് സല്യൂട്ട്. എന്തു സംഭവിച്ചാലും നമ്മള്‍ ഒറ്റക്കെട്ടാണ്. പരസ്പരം സഹായിക്കുകയും ചെയ്യുന്നു. കാലവര്‍ഷക്കെടുതിയില്‍ പെട്ടവര്‍ക്കായി പ്രാര്‍ഥിക്കുന്നുവെന്നും കുറിപ്പില്‍ പറയുന്നു ദുല്‍ഖര്‍.
വയനാട് കല്‍പ്പറ്റയില്‍ മേപ്പാടി മുണ്ടക്കൈ ദുരന്ത ഭൂമിയായിരിക്കുകയാണ്. ഇന്നലെ പുലര്‍ച്ചെ രണ്ട് മണിയോടെയാണ് അപകടം സംഭവിച്ചത്. 199 പേരാണ് ഉരുള്‍പൊട്ടലില്‍ മരിച്ചത്. ഉറ്റവരെ തേടി അലയുന്ന കുടുംബാംഗങ്ങളുടെ ദാരുണമായ കാഴ്‍ചയുമാണ് വയനാട്ടില്‍ കാണാനാകുന്നത്.
ചൂരല്‍മലയില്‍ താലൂക്കുതല ഐആര്‍സ് കണ്‍ട്രോള്‍ റൂം തുറന്നിട്ടുണ്ട് . ഡെപ്യൂട്ടി കളക്ടര്‍- 8547616025, തഹസില്‍ദാര്‍ വൈത്തിരി 8547616601 എന്നിങ്ങനെയാണ് നമ്പര്‍ നല്‍കിയിരിക്കുന്നത്. വയനാട് കല്‍പ്പറ്റ ജോയിന്റ് ബിഡിഒ ഓഫീസ് നമ്പര്‍ 9961289892. ദുഷ്‍കരമാണ് രക്ഷാപ്രവര്‍ത്തനം എന്നും റിപ്പോര്‍ട്ടുണ്ട്. ഒറ്റപ്പെട്ട മേഖലയില്‍ നിന്ന് ആളുകളെ വേഗത്തില്‍ പുറത്തെത്തിക്കാനാണ് ശ്രമം. മുമ്പ് വയനാട് പുത്തുമല ഉരുള്‍പൊട്ടല്‍ ദുരന്തം ഉണ്ടായ സ്ഥലത്തിന് അടുത്താണ് മുണ്ടക്കൈ.
