ക്യാൻസർ രോഗത്തെ അതിജീവിച്ചത് മൂത്രം കുടിച്ച്; എന്ത് അസുഖത്തിനും രക്ഷകനായി മൂത്രമുണ്ട്: കൊല്ലം തുളസി

തൃശൂർ: താൻ കാൻസറിനെ അതിജീവിച്ചത് മൂത്ര ചികിത്സയിലൂടെയാണെന്ന് നടൻ കൊല്ലം തുളസി. എന്ത് അസുഖമുണ്ടെങ്കിലും മൂത്രം കുടിച്ചാൽ മതിയെന്നും ആശുപത്രിയിൽ കയറിയിറങ്ങേണ്ട കാര്യമില്ലെന്നും അദ്ദേഹം പറഞ്ഞു. തൃശൂരിൽ യൂറിൻ തെറാപ്പി സംസ്ഥാന സമ്മേളനത്തിലാണ് കൊല്ലം തുളസിയുടെ വാക്കുകൾ. നേരത്തെയും മൂത്ര ചികിത്സയെക്കുറിച്ച് തുളസി പറഞ്ഞ കാര്യങ്ങൾ ചർച്ചയായിരുന്നു.

മനുഷ്യമൂത്രത്തിന്‍റെ ഔഷധഗുണങ്ങളും ശാസ്ത്രീയതയും ചർച്ചചെയ്യാനായാണ് തൃശൂരിൽ യൂറിൻ തെറാപ്പി സംസ്ഥാന സമ്മേളനം ചേർന്നത്. എല്ലാ വൈദ്യശാസ്ത്രവും പരാജയപ്പെടുമ്പോഴാണ് നമ്മൾ മറ്റുവഴികൾ നോക്കുന്നത്. എനിക്ക് കാൻസർ പി‌ടിപെട്ടപ്പോൾ അതിനെ അതിജീവിക്കാൻ പല വഴികളും തേടി. ഒടുവിലാണ് യൂറിൻ തെറാപ്പിയെപ്പറ്റി അറിഞ്ഞത്. അതിലൂടെയാണ് രോഗത്തെ അതിജീവിച്ചതെന്നാണ് കൊല്ലം തുളസി പറഞ്ഞത്.

പലരും പല രോഗങ്ങൾക്കും മൂത്രം കുടിക്കുന്നുണ്ടെങ്കിലും പുറത്തുപറയാതെയിരിക്കുകയാണെന്നും കൊല്ലം തുളസി പറഞ്ഞു. എനിക്ക് 75 വയസ്സുണ്ട്. ഇനിയൊരു 25 വർഷം കൂടി ജീവിക്കണമെന്നാണ് ആഗ്രഹം.എന്ത് അസുഖത്തിനും എനിക്ക് രക്ഷകനായി മൂത്രമുണ്ട്. ഇതിന് വലിയ ആശുപത്രിയിൽ പോവുകയോ ഡോക്‌ടറെ കാണുകയോ, മെഡിക്കൽ സ്റ്റോറിൽ പോവുകയോ ഒന്നും വേണ്ട, മറിച്ച് മൂത്രം കുടിച്ചാൽ മതിയെന്നും അദ്ദേഹം കൂട്ടിച്ചേർത്തു.

എല്ലാ വൈദ്യശാസ്ത്രവും പരാജയപ്പെടുമ്പോഴും എല്ലാ വാതിലുകളും കൊട്ടിയടയുമ്പോഴും എന്തിനെയും കയറി പ്രാപിക്കാൻ ശ്രമിക്കുന്ന മാനസികാവസ്ഥ എല്ലാവർക്കും ഉണ്ടാവാറുണ്ട്. കാൻസർ പിടിപെട്ടപ്പോൾ കുറച്ചുനാൾ കൂടി ജീവിച്ചിരിക്കണമെന്ന മോഹം കാരണം പല വഴികളും തേടി. അങ്ങനെയാണ് യൂറിൻ തൊറാപ്പിയെക്കുറിച്ച് അറിയുന്നത്.

നമ്മൾ ഇനിയും കാണമെന്നുണ്ടെങ്കിൽ ഇപ്പോൾ തന്നെ മൂത്രം കുടിച്ച് തുടങ്ങിക്കോ, പലരും ഉപയോഗിക്കുന്നുണ്ടെങ്കിലും പറയാൻ ചമ്മലാണ്. ഇന്നല്ലേൽ നാളെ ലോകം ഉറക്കെ പറയുന്ന അവസരം വരും. ഇക്കാര്യം ഉറക്കെ പറയുന്നതിന് വളരെ മ്ലേച്ചമായ തെറികൾ കേൾക്കേണ്ടി വന്നിട്ടുണ്ട്. എന്‍റെ മൂത്രം കുടിക്കുന്നതിന് ഞാൻ എന്തിനാണ് തെറി കേൾക്കുന്നതെന്നും കൊല്ലം തുളസി ചോദിച്ചു