കനയ്യ കുമാറിനെതിരെ ആക്രമണം; തിരഞ്ഞെടുപ്പ് പ്രചരണത്തിനിടെ മുഖത്തടിച്ചു, ദേഹത്ത് മഷിയൊഴിച്ചു
ന്യൂഡല്‍ഹി: കോണ്‍ഗ്രസിന്റെ ലോക്സഭാ സ്ഥാനാര്‍ത്ഥി കനയ്യ കുമാറിനെതിരെ ആക്രമണം. വെള്ളിയാഴ്ച കിഴക്കന്‍ ഡല്‍ഹിയിലെ ന്യൂ ഉസ്മാന്‍പൂര്‍ പ്രദേശത്ത് പ്രചരണത്തിനിടെയാണ് സംഭവം. ഏഴോ എട്ടോ പേര്‍ ചേര്‍ന്ന് ആക്രമിക്കുകയും കനയ്യ കുമാറിന് നേര്‍ക്ക് കറുത്ത മഷി എറിയുകയുമായിരുന്നു. ആക്രമണത്തിന്റെ വീഡിയോകള്‍ സോഷ്യല്‍ മീഡിയയില്‍ പ്രചരിക്കുന്നുണ്ട്.
ആക്രമണം നടത്തിയവരില്‍ രണ്ട് പേര്‍ കനയ്യ കുമാറിനെ മര്‍ദ്ദിച്ചു. രാജ്യത്തെ തകര്‍ക്കുന്നതിനെക്കുറിച്ച് മുദ്രാവാക്യം വിളിച്ചതിനാലും ഇന്ത്യന്‍ സൈന്യത്തിനെതിരെ സംസാരിച്ചതിനാലുമാണ് തങ്ങള്‍ അങ്ങനെ ചെയ്തതെന്ന് വിളിച്ച് പറയുന്ന വീഡിയോകളും പുറത്തുവിട്ടിട്ടുണ്ട്. അക്രമികള്‍ തന്നെയാണ് വീഡിയോ പുറത്ത് വിട്ടത്. ബ്രഹ്‌മപുരിയില്‍ നിന്നുള്ള എഎപി കൗണ്‍സിലര്‍ ഛായ ഗൗരവ് ശര്‍മ്മ സംഭവത്തില്‍ പരാതി നല്‍കി.
താനും കനയ്യ കുമാറും കര്‍താര്‍ നഗറിലെ പാര്‍ട്ടി ഓഫീസില്‍ നിന്ന് ഇറങ്ങുമ്പോള്‍ ചിലര്‍ കനയ്യ കുമാറിനെ ഹാരമണിയിക്കാന്‍ എന്ന വ്യാജേന എത്തി മഷി എറിയുകയും തുടര്‍ന്ന് മര്‍ദിക്കുകയും ചെയ്തു. മൂന്നോ നാലോ സ്ത്രീകള്‍ക്ക് പരിക്കേറ്റതായും ഒരു വനിതാ മാധ്യമപ്രവര്‍ത്തക അഴുക്കുചാലില്‍ വീണതായും അവര്‍ പറഞ്ഞു.
