ചർമ്മം തിളങ്ങാൻ ഫേസ് മാസ്ക് മാത്രം പോരാ, ഭക്ഷണത്തിലും ശ്രദ്ധ വേണം

ചർമ്മ സംരക്ഷണം അത്ര എളുപ്പമുള്ള കാര്യമല്ല. ദിവസവും മുഖമൊക്കെ കഴുകി വ്യത്തിയാക്കുകയും സൺസ്ക്രീനും മോയ്ചറൈസറുമൊക്കെ ഇട്ടാലും ചർമ്മത്തിൽ പലപ്പോഴും പല പ്രശ്നങ്ങളാണ്. ചർമ്മത്തിൽ തേയ്ക്കുന്നത് മാത്രമല്ല ഭക്ഷണത്തിലും അൽപ്പം ശ്രദ്ധ നൽകിയാൽ മാത്രമേ ചർമ്മ സംരക്ഷണം പൂർണമാവുകയുള്ളൂ. ധാരാളം വെള്ളം കുടിക്കുന്നത് ചർമ്മത്തിനും മുടിയ്ക്കും പല രീതിയിലുള്ള ഗുണങ്ങൾ നൽകാറുണ്ട്. അതുപോലെ ഭക്ഷണത്തിൽ ചില കാര്യങ്ങൾ ശ്രദ്ധിക്കുന്നതും ചർമ്മത്തിനും മുടിയ്ക്കും വളരെ നല്ലതാണ്.

, നആൻ്റി ഓക്സിഡൻ്റുകൾ
ചർമ്മത്തിന് വളരെയധികം ആവശ്യമുള്ളതാണ് ആൻ്റി ഓക്സിഡൻ്റുകൾ. പഴങ്ങളും പച്ചക്കറികളും ആൻ്റിഓക്‌സിഡൻ്റുകളാൽ സമ്പുഷ്ടമാണ്. മുഖക്കുരു നിയന്ത്രിക്കാൻ സഹായിക്കുന്ന ആൻറി-ഇൻഫ്ലമേറ്ററി ഗുണങ്ങളാൽ പ്രവർത്തിക്കാൻ ഇവയ്ക്ക് കഴിയും,. ആൻ്റിഓക്‌സിഡൻ്റുകളാൽ സമ്പന്നമായതിനാൽ പല നിറങ്ങളിലുള്ള പഴങ്ങളും പച്ചക്കറികളും തിരഞ്ഞെടുക്കുക. സരസഫലങ്ങൾ, സിട്രസ് പഴങ്ങൾ, മത്തങ്ങ, പപ്പായ, പൈനാപ്പിൾ, ആപ്പിൾ, സ്ട്രോബെറി മുതലായവ ഇതിൽ ഉൾപ്പെടുന്നുണ്ട്. ഈ ആൻ്റിഓക്‌സിഡൻ്റുകൾ ഫ്രീ റാഡിക്കലുകളെ ചെറുക്കാനും ഓക്സിഡേറ്റീവ് സമ്മർദ്ദം കുറയ്ക്കാനും സഹായിക്കും. ഇത് മുഖക്കുരു കുറച്ച് ചർമ്മത്തിന് തിളക്കം നൽകാൻ സഹായിക്കുന്നു.

വെള്ളം കുടിക്കുക
ശരീരത്തിൽ ആവശ്യത്തിന് ജലാംശം നിലനിർത്തേണ്ടത് ഏറെ പ്രധാനമാണ്. ശരീരത്തിന് ജലാംശം ഒരു പ്രധാന ആവശ്യമാണ്. ധാരാളം വെള്ളം കുടിക്കുന്നത് ശരീരത്തിൽ നിന്ന് വിഷവസ്തുക്കളെ നീക്കം ചെയ്യുകയും മുഖക്കുരു വരാനുള്ള സാധ്യതയെ മറികടക്കാൻ സഹായിക്കുകയും ചെയ്യുന്നു. ജലാംശമുള്ള ചർമ്മത്തിന് ഒരാൾ ദിവസവും കുറഞ്ഞത് 7-8 ഗ്ലാസ് വെള്ളമെങ്കിലും കഴിക്കണം.

ഒമേഗ 3 ഫാറ്റി ആസിഡ്
കൊഴുപ്പുള്ള മത്സ്യവും ഒമേഗ-3 ഫാറ്റി ആസിഡും അടങ്ങിയ മത്സ്യങ്ങൾ ച‍ർമ്മത്തിന് വളരെ നല്ലതാണ്. ഒമേഗ-3 അടങ്ങിയ ഭക്ഷണ സ്രോതസ്സുകളായ മത്തി, സാൽമൺ, അയല, ചിയ വിത്തുകൾ, വാൽനട്ട്, ഫ്ളാക്സ് സീഡുകൾ എന്നിവ മുഖക്കുരു ഇല്ലാതാക്കാൻ സഹായിക്കുന്നു. മാത്രമല്ല മുഖക്കുരു മൂലമുണ്ടാകുന്ന പല പ്രശ്നങ്ങൾക്കുമുള്ള പരിഹാരം കൂടിയാണിവ. ഒമേഗ -3 ഫാറ്റി ആസിഡുകൾക്ക് ആൻറി-ഇൻഫ്ലമേറ്ററി ഗുണങ്ങളുണ്ട്, ഇത് മുഖക്കുരു കുറയ്ക്കുകയും ചർമ്മത്തെ ശുദ്ധീകരിക്കുകയും ചെയ്യും.

പ്രോബയോട്ടിക്സ്
ആരോഗ്യത്തിന് തൈര് നൽകുന്ന ഗുണങ്ങൾ പലതാണ്. അതുപോലെ ചർമ്മത്തിനും പ്രോബയോട്ടിക്സ് ഏറെ നല്ലതാണ്. ആരോഗ്യകരമായ ഒരു ഗട്ട് മൈക്രോബയോം ചർമ്മത്തിൻ്റെ ആരോഗ്യം മെച്ചപ്പെടുത്തുന്നതിൽ വലിയ പങ്ക് വഹിക്കുന്നുണ്ട്. മാത്രമല്ല കുടലിൻ്റെ ആരോഗ്യം മെച്ചപ്പെടുത്താനും രോ​ഗപ്രതിരോധ ശേഷി കൂട്ടാനും വളരെ നല്ലതാണ് പ്രോബയോട്ടിക്സ്. മുഖക്കുരുവിൻ്റെ തീവ്രതയെ മറികടക്കാൻ ഇത് സഹായിക്കും. ആരോഗ്യകരമായ കുടൽ അന്തരീക്ഷം നിലനിർത്താൻ സഹായിക്കുന്ന സോർക്രാട്ട്, കെഫീർ, തൈര്, കോംബുച്ച തുടങ്ങിയ പുളിപ്പിച്ച ഭക്ഷണങ്ങളിൽ കാണപ്പെടുന്ന നല്ല ബാക്ടീരിയകളാണ് പ്രോബയോട്ടിക്സ്

പാൽ ഉത്പ്പന്നങ്ങൾ
ചിലർക്ക് പാൽ ഉത്പ്പന്നങ്ങൾ കഴിക്കുന്നത് മുഖത്ത് മുഖക്കുരു വരാൻ കാരണമാകാറുണ്ടെന്ന് പല പഠനങ്ങളും പറയുന്നുണ്ട്. പാലിലെ ചില ഹോർമോണുകളാണ് മുഖക്കുരു ഉണ്ടാക്കുന്നത്.
പാലിലെ പ്രോട്ടീനുകളായ whey, Casin എന്നിവ മുഖക്കുരു ഉണ്ടാകുന്നതിന് കാരണമാകും. പാലിലെ ഹോർമോണുകൾ ടെസ്റ്റോസ്റ്റിറോണിൻ, ഈ പ്രോട്ടീനുകളുമായി സംയോജിക്കുന്നത് മുഖക്കുരു വർദ്ധിപ്പിക്കും. മുഖക്കുരു അമിതമായാൽ ഡയറി സ്രോതസ്സുകൾ നിയന്ത്രിക്കുന്നത് ഒരു മികച്ച ഓപ്ഷനായിരിക്കും. ഇതിന് പകരമായി ഓട്‌സ്, തേങ്ങ, ബദാം പാൽ എന്നിവ ഭക്ഷണത്തിൽ ഉൾപ്പെടുത്താം.