കൂറ്റൻ മുതലയെ താലോലിച്ച് യുവതി; പൊട്ടിത്തെറിച്ച് നെറ്റിസൺസ്

സൈബർ ലോകത്ത് പലതരത്തിലുള്ള വീഡിയോകളാണ് ഓരോ ദിവസവും പ്രചരിക്കുന്നത്. ചില വീഡിയോകൾ വളരെ പെട്ടെന്ന് വൈറലാകുകയും ചെയ്യും. ചില വീഡിയോ ദൃശ്യങ്ങൾ നെറ്റിസൺസിന്റെ രൂക്ഷ വിമർശനത്തിനും വിധേയമാകാറുണ്ട്. അത്തരത്തിൽ സൈബർ ലോകത്ത് രൂക്ഷമായ വിമർശനമാണ് ഇപ്പോൾ ഒരു യുവതി ഏറ്റുവാങ്ങുന്നത്. കൂറ്റൻ മുതലയെ തലോടുന്ന യുവതിയുടെ വീഡിയോ ഇപ്പോൾ സമൂഹ മാധ്യമങ്ങളിൽ വലിയ തോതിൽ രൂക്ഷവിമർശനം നേരിടുകയാണ്.

ഫ്ലോറിഡ സ്വദേശിനിയായ സവന്ന ബോൺ എന്ന യുവതിയാണ് വീഡിയോയിൽ ഉള്ളത്. ഒരു വന്യജീവി സങ്കേതം എന്ന് തോന്നിക്കുന്ന സ്ഥലത്ത് ഒരു വലിയ കുളത്തിൽ കഴിയുന്ന കൂറ്റൻ മുതലയെയാണ് ഈ യുവതി ലാളിക്കുന്നത്. മുതലയെ പേര് ചൊല്ലുവിളിക്കുകയും അതിൻറെ തലയിൽ തലോടുകയും ചെയ്യുന്നതും വീഡിയോയിൽ കാണാം. ഇടയ്ക്ക് മുതല വാ പൊളിച്ച് യുവതിക്ക് അരികിലേക്ക് അടുക്കുമ്പോൾ അവൾ അതിൻറെ വായിലേക്ക് ഭക്ഷണം ഇടുന്നതും കാണാം. മുതലയുമായുള്ള ഇടപെടലിൽ യുവതി അല്പം പോലും ഭയപ്പെടുന്നില്ലെന്നത് കാഴ്ചക്കാരെ അത്ഭുതപ്പെടുത്തി. വീഡിയോ കണ്ട പലരും അഭിപ്രായപ്പെട്ടത് ഇത്തരത്തിലുള്ള അപകടകരമായ സാഹചര്യങ്ങൾ എന്തിന് സ്വയം സൃഷ്ടിക്കുന്നു എന്നായിരുന്നു.

ഫ്ലോറിഡയിൽ വന്യജീവികളുടെ സംരക്ഷണത്തിനായി പ്രവർത്തിക്കുന്ന ഇവർ ചീങ്കണ്ണികളുടെയും മുതലകളുടെയും പുനരധിവാസ പ്രവർത്തനങ്ങളിൽ സജീവമാണ്. ഫ്ലോറിഡയിലെ ഒർലാൻഡോയിലെ ഗട്ടോർലാൻഡിലെ ക്രോക്കോഡിലിയൻ എൻറിച്ച്‌മെൻറ് പദ്ധതിയുടെ കോഡിനേറ്റർ കൂടിയാണ് സവന്ന. ഒർലാൻഡോയിലെ ഗട്ടോർലാൻഡിലെ 125 ഏക്കറിൽ സ്ഥാപിക്കപ്പെട്ടിട്ടുള്ള -“ദി അലിഗേറ്റർ ക്യാപിറ്റൽ ഓഫ് ദി വേൾഡ്” എന്ന തീം പാർക്കിൻറെ ഭാഗമായാണ് ഇവർ പ്രവർത്തിക്കുന്നത്. ഇരുനൂറോളം മുതലകളും ചീങ്കണ്ണികളുമാണ് ഈ പാർക്കിലുള്ളത്. ഈ പാർക്കിനുള്ളിൽ നിന്നും ചിത്രീകരിച്ച വീഡിയോയാണ് ഇപ്പോൾ സമൂഹ മാധ്യമങ്ങളിൽ വലിയ ചർച്ചകൾക്ക് വഴി .തുറന്നിരിക്കുന്നത് .