നല്ല മൊരുമൊര ഇരിക്കുന്ന റാഗി പാലപ്പം മിനിറ്റുകൾക്കുള്ളിൽ വീട്ടിൽ തയാറാക്കാം

പ്രഭാത ഭക്ഷണം ആരോഗ്യത്തിന് ഏറെ പ്രധാനമാണ്. ഒരു ദിവസത്തെ ഊർജ്ജം മുഴുവൻ നൽകുന്നത് രാവിലത്തെ പ്രഭാത ഭക്ഷണം. സ്ഥിരമായി രാവിലത്തെ പ്രഭാത ഭക്ഷണം ഒഴിവാക്കുന്നത് അത്ര നല്ലതല്ല. പല ജീവിതശൈലി രോഗങ്ങളും ഒരു പരിധി വരെ ചെറുക്കാൻ രാവിലത്തെ പ്രഭാത ഭക്ഷണം കഴിക്കുന്നത് സഹായിക്കും. പ്രമേഹം, ഉയർന്ന രക്തസമ്മർദ്ദം, ഹൃദ്രോഗങ്ങൾ പോലെയുള്ളവ മാറ്റാനും ഇത് ഏറെ സഹായിക്കും. പ്രഭാത ഭക്ഷണം ഒഴിവാക്കുന്നത് ടൈപ്പ് 2 പ്രമേഹം വരാനുള്ള സാധ്യത വളരെ കൂടുതലാണ്.

റാഗി

ആരോഗ്യത്തിന് ഏറെ ഗുണകരമാണ് റാഗി. മറ്റ് ധാന്യങ്ങൾ അപേക്ഷിച്ച് പോഷക ഗുണങ്ങളാൽ സമ്പുഷ്ടമാണ് റാഗി. അമിനോആസിഡുകൾ–ഐസോല്യൂ സിൻ, മെഥിയോനൈൻ, ഫിനൈൽഅലനൈൻ എന്നിവയെല്ലാം റാഗിയിലുണ്ട്. മാത്രമല്ല കാൽസ്യത്തിന്റെയും പൊട്ടാസ്യത്തിന്റെയും കലവറയാണ് റാഗി. ധാരാളമായി ഇരുമ്പ് അടങ്ങിയിരിക്കുന്നതിനാൽ ഹീമോഗ്ലോബിൻ കുറവുള്ളവർക്ക് ഏറെ നല്ലതാണ്.
വൈറ്റമിൻ ബി 6, ഫോളിക് ആസിഡ് എന്നിവയെല്ലാം റാഗിയിലുണ്ട്. ഡയറ്ററി ഫൈബറും നാരുകളും പോളിഫിനോളും ധാരാളമായി ഉള്ളതിനാൽ ആൻ്റി ഓക്സിഡൻ്റ് ആൻ്റി ഡയബറ്റിക്, ആൻ്റി മൈക്രോബിയൽ ഗുണങ്ങൾ ഇതിനുണ്ട്.

പാലപ്പം തയാറാക്കാൻ ആവശ്യമുള്ള സാധനങ്ങൾ

അര കപ്പ് റാഗി
അര കപ്പ് ഗോതമ്പ് പൊടി
6 ടേബിൾ സ്പൂൺ തേങ്ങ ചിരകിയത്
5 ടേബിൾ സ്പൂൺ റവ
5 ടേബിൾ സ്പൂൺ ചോറ്
1 ടീ സ്പൂൺ ഉപ്പ്
ഒന്നരകപ്പ് വെള്ളം
1 ടീ സ്പൂൺ യീസ്റ്റ്
2 ടേബിൾ സ്പൂൺ പഞ്ചസാര

തയാറാക്കുന്ന വിധം

യീസ്റ്റ് ഒഴികെ മുകളിൽ പറഞ്ഞിരിക്കുന്ന എല്ലാ സാധനങ്ങളും ഒരു വലിയ ബൗളിലിട്ട് യോജിപ്പിക്കുക. അതിന് ഒന്നരകപ്പ് വെള്ളം ഇതിലേക്ക് ഒഴിച്ച ശേഷം ഇത് മിക്സിയിലിട്ട് നന്നായി അരച്ച് എടുക്കുക. നല്ല മൃദുവായ മാവ് ലഭിക്കുന്നതിന് വേണ്ടി 2 മിനിറ്റോളം ഇത് അരയ്ക്കണം. ഇനി മറ്റൊരു പാത്രത്തിലേക്ക് യീസ്റ്റ് എടുത്ത ശേഷം അതിലേക്ക് വെള്ളവും പഞ്ചസാരയും ചേർത്ത് യോജിപ്പിക്കുക. ചെറു ചൂടുവെള്ളത്തിൽ വേണം യീസ്റ്റ് യോജിപ്പിച്ച് എടുക്കാൻ. ഇനി ഇത് തയാറാക്കി വച്ചിരിക്കുന്ന മാവിലേക്ക് ഒഴിച്ച് നന്നായി യോജിപ്പിച്ച് എടുക്കുക. ഇനി 20 മുതൽ 30 മിനിറ്റ് ഈ മാവ് മാറ്റി വയ്ക്കുക. നന്നായി പുളിച്ച് വരുന്ന ഈ മാവ് ഇളക്കി എടുത്ത് പാലപ്പ ചട്ടിയിൽ ഒഴിച്ച് അപ്പം ചുട്ട് എടുക്കാവുന്നതാണ്.